- KKR સામેની મેચમાં ઈશાંત શર્માની વાપસી થઈ
- આ ભારતીય દિગ્ગજે છેલ્લી IPL મેચ 2021માં રમી હતી
- IPL 2022ની મેગા ઓક્શનમાં ઈશાંત અનસોલ્ડ રહ્યો હતો
IPL 2023ની પાંચેય મેચો હાર્યા બાદ, જ્યારે દિલ્હીની ટીમે ગુરુવારે રાત્રે કોલકાતા નાઈટ રાઈડર્સનો સામનો કર્યો હતો, ત્યારે ટીમના પ્લેઈંગ-11માં ઘણા ફેરફારો થયા હતા.
તેમાંથી સૌથી મોટો ફેરફાર ઈશાંત શર્માની વાપસીનો હતો. આ મેચ પહેલા આ ભારતીય દિગ્ગજ બોલરે છેલ્લી IPL મેચ 2021માં રમી હતી. ત્યારબાદ તેને માત્ર ત્રણ મેચ રમવાની તક મળી. અગાઉ આઈપીએલ 2020માં પણ ઈશાંત માત્ર એક જ આઈપીએલ મેચ રમી શક્યો હતો. આ બે સિઝનમાં બહુ ઓછી તકો મળ્યા બાદ, IPL 2022ની મેગા ઓક્શનમાં ઈશાંતને કોઈએ ખરીદ્યો ન હતો. તે અનસોલ્ડ રહ્યો હતો.
આ IPL પહેલા દિલ્હી કેપિટલ્સે તેના પર બોલી લગાવી હતી અને તેને 50 લાખની બેઝ પ્રાઇઝ સાથે પોતાની ટીમમાં સામેલ કર્યો હતો. જોકે, અહીં પણ ઈશાંતને પહેલી પાંચ મેચમાં કોઈ તક મળી ન હતી. જ્યારે દિલ્હીએ બેક ટુ બેક મેચો હારવાનું શરૂ કર્યું, ત્યારે ટીમ મેનેજમેન્ટે આ અનુભવી ખેલાડીને બોલ સોંપ્યો અને પછી ઈશાંતે તે કર્યું જેની દિલ્હી કેપિટલ્સ આ સિઝનમાં આતુરતાથી રાહ જોઈ રહી હતી.
પહેલી બે ઓવરમાં ચુસ્ત બોલિંગ
ઇશાંતે IPL 2023માં દિલ્હી કેપિટલ્સને તેમની પહેલી જીત અપાવી હતી. તેની બોલિંગના કારણે જ દિલ્હીની ટીમ KKRને ખૂબ જ ઓછા સ્કોર સુધી રોકી શકી હતી. ઈશાંતે આ મેચમાં દિલ્હી માટે પહેલી ઓવર ફેંકી અને માત્ર પાંચ રન જ આપ્યા. આ ઓવરમાં તેના દ્વારા સર્જાયેલા દબાણનું પરિણામ એ આવ્યું કે મેચની બીજી ઓવરમાં કેકેઆરના બેટ્સમેન લિટન દાસે મોટો શોટ રમવાના પ્રયાસમાં મુકેશ કુમારને વિકેટ આપી દીધી. આ પછી ઈશાંતે તેની બીજી ઓવરમાં પણ માત્ર પાંચ રન આપ્યા હતા. અહીં ફરીથી KKR પર દબાણ આવ્યું અને ચોથી ઓવરમાં વેંકટેશ અય્યરે મોટો શોટ રમતા પોતાની વિકેટ ગુમાવી દીધી.
બે ખતરનાક બેટ્સમેનોને પેવેલિયન મોકલ્યા
કેપ્ટન ડેવિડ વોર્નરે ઇશાંત પાસે બોલિંગ કરાવવાનું ચાલુ રાખ્યું અને તેની ત્રીજી ઓવરમાં ઇશાંતે KKRના કેપ્ટન નીતિશ રાણાને પેવેલિયન મોકલી દીધો અને દિલ્હીને ડ્રાઇવિંગ સીટ પર લઈ આવ્યો. તેની છેલ્લી ઓવરમાં પણ ઇશાંતે સુનીલ નારાયણને પેવેલિયન મોકલ્યો હતો. આ રીતે, આ અનુભવી ભારતીય બોલરે 4 ઓવરમાં માત્ર 19 રન આપીને બે વિકેટ ઝડપી હતી.
ઈશાંત ‘પ્લેયર ઓફ ધ મેચ’ બન્યો
ઈશાંતની બોલિંગની સાથે-સાથે દિલ્હી કેપિટલ્સના અન્ય બોલરોએ પણ ખૂબ જ સારી બોલિંગ કરી અને પરિણામ એ આવ્યું કે સમગ્ર KKR ટીમ માત્ર 127 રન જ બનાવી શકી, જે દિલ્હીએ 6 વિકેટ ગુમાવીને હાંસલ કરી. તેની શાનદાર બોલિંગના કારણે ઈશાંત શર્મા ‘પ્લેયર ઓફ ધ મેચ’ તરીકે પસંદ થયો હતો.
